迴轉壽司大家就食得多，去日本旅行又有冇試過「立食壽司」（立ち食い寿司）呢？

冇錯，就係要企喺度食嘅壽司店！

呢種日本獨有嘅飲食文化，節奏快過香港人趕地鐵，好多鋪頭連點菜タブレット（平板）都冇，全靠睇牆上「看板メニュー」或者直接同壽司師傅「眼神交流」落單。17嘅屋企人雖然好鍾意食壽司，但係因為語言障礙每次都對立食壽司店卻步！對唔識日文嘅遊客來講可能真係有少少頭痕，但勝在性價比超高，仲有隱藏菜單等你去發掘！  🤣🤣👍🏻

點解立食壽司咁受日本人追捧？

立食壽司嘅精髓就係「快、靚、平」！

因為冇座位成本，價錢通常比迴轉壽司更抵食，一碟吞拿魚赤身可能只需100円（約5蚊港紙）起跳。

師傅即握即上，壽司飯嘅溫度同魚生嘅鮮度完美配合，好多本地打工仔都會趁lunch time衝入去「快閃」醫肚。一個餐12件壽司，仲有埋味噌湯可能都只不過係1000円！

不過要留意，部分名店嘅「おまかせ」（師傅發辦）隱藏菜單，可能要用簡單日文問句「今日のおすすめは？」Kyo no osusume wa？（今日推薦咩？）先解鎖到當日最靚貨色！  

遊客挑戰：冇圖冇英文點落單？

而家好多繁華地區嘅立食店都已經增加咗iPad點菜，對於冇電子Menu嘅立食店，通常得日文手寫看板同師傅口頭報菜。17推薦記住幾個必備單字：  

「サーモン」（三文魚）  

「えび」（蝦）  

當然仲有トロ拖羅、ほたて帆立貝、うなぎ鰻魚等等！仲可以揀點樣製法，タレ係醬汁，塩、ポン酢等等🙈💕真係花多眼亂㗎！見到師傅拎住啲閃令令嘅時令魚生，不妨指住講一句「これ、お願いします！」（呢個，唔該你！），實冇錯！

東京新橋、池袋，銀座，大阪梅田呢啲商業區，仲有專做深夜立食嘅舖頭，下午時段仲熱鬧過香港大排檔！  

下次去日本，不妨放低「一定要坐低食」嘅執著，試吓呢種地道體驗。企喺師傅面前睇住佢手起刀落，仲有機會食到即開海膽或現拆蟹膏，分分鐘平過香港超市外賣壽司盒！話唔定你會愛上呢種「企定定都食到高質」嘅爽快感呢～